yudh viram

shanti ..yudh viram ka dusra naam hai . agar koi 2 desh jaha halat bad se badtar hote jo rahe ho aur voh bhi teesre takat ki wajah se aur voh bhi tab jab yeh teesri takat(talibaan) dusre ke paale mein baith kar apni chal ek lomdi ki tarah khel raha ho . taliban ek lomdi ki tarah apni chaal chale ja raha hai aur voh bhi pak ki god mein baith kar to yeh jo shanti najar aa rahi hai voh sahi mein ek yudh viram ki tarah hai ..aur is baar ka yudh bade paimaane par lada jayega jaha india,usa aur israel ek taraf honge aur ek taraf sirf talibaan ( kyon ki aane wale 4-5 saalo mein pure pak par talibaan ka kabja ho chuka hoga ..aaj swat ghati , peshawar,sindh aur punjaab tak to yeh talibaan aa hi gayi hai ) ..aur is baar ki yeh ladai aar-paar ki hogi jaha pak aur palibaan puri tarah se khatam ho chuke honge ..

life jhinga lala

Abhi pichle dino main apne ek mitr ke yaha party mein tha ..party kya hoti hai main isko nahi batane ja raha hu . jo apne family se door kaam-kaaji hai aur abhi tak kuware-ashram mein hai ya to room-partner ke sath rahte hai YA akele hi. Aur jab 2-4 din khali mil jaaye to phir kisi aise ladke ke ghar par jamawada hota hai yaha ache tarah se party ho jati hai jaha shadi-shuda log bus khane aur 2-4 peg tak tak simit rahte hai(yeh voh log hote hai jo aaye-khaaye-piye aur khisak liye type ke hote hai ) aur kuware log tab tak party ka maja lete hai ..jab tak agle din office na ho aur kisi ka bhi daru ka ek boond pine tak ka dil na kare ..kyon ki tab tak yeh itni daru pi chuke hote hai ki agle din subah mein bottle room ke bahar rakhne ki bhi jahmat nahi uthate !!!!
Kuch aisi hi party rahi yeh bhi ..main thoda pahle hi pachuch gaya tha kyon ki mejbaan mera acha dost hai aur usne mujhse hi bol rakha tha ki sary party ka intejaam tumhe hi karna hai .sary party ka intejaam = matlab kaun aadmi kis brand ka peeta hai ..mujhe yaad tha aur sare daru mujhe lene the ! khair sara itejaam hua aur pine ke sath-2 khanaa ka bhi intejaam hua ..
Party shuru hone mein time tha ..main tv dekhne baith gaya ..main apni aadat se majboor !! ek kisi khas channel ko dekh nahi pata main ..ya yun kahle ki kisi khas channel mein kya ho raha hai bus mujhe uska ek view chahiye hota hai nahi to phir YA to NEWS channel dekh raha hota hu YA phir MTv , voh bhi is liye ki kaun sa naya gana aaya hai aur kis singer ke album aaye hai taki main unka gana pasand aane par unhe apne music store mein rakh lu ..
Tab tak kuch aur dost bhi aa chuke the aur wohi par baith gaye TV dekhne !! sare jaante the ki main kis aadat se majboor hu !! baar-baar channel badalne se .mejbaan dost ne ek company ka DTH le rakha hai jiske slogan yeh hai ki “isko laga dala to life jhingalala !!” pata nahi mere dost ki life jhingalala hui ya nahi par main bore ho raha tha isiliye baar-2 channel badal raha tha .ant mein jab mujhe nahi sujha ki kya dekhu to main remote rakh diya aur aaram se party ka maja lene lag gaya ..
Ek daur-e-jaam chalne ke baad TV par kya aa raha hai yeh dekhne ki fursat kisi ko nahi hoti ..voh daur hota hai jab kaano mein bus kuch sunaai dena chahiye ..chahe voh music ho ya news.baat nikal padi un dino ki jab tv-darshan ke naam par DOORDARSHAN hua karta aur tv ke naam par ya to color tv nahi to phit B&W aur uske sath antenna !!!!
Sabhi apne apne kisse sunane lag gaye .maine kaha “yaar DOORDATSHAN is d mother of all channel .dekh to sare channel uski ka nakal karke aage nikal gaye .yeh sala cable mein kuch maja nahi hai . voh bhi kya din the jab hum chat par chadh jaya karte the aur antenna ko kabhi idhar ghumte the to kabhi udhar ghumate the aur phir jor se chilla kar puchte the ki AAYYA KYA ?? bhai bolta tha –thoda pahle jaise ghumaao ..abhi pic thik aa gaya tha !! hahaahahaa ..ab sochne lag jate the ki kidhar ghumaya tha abhi ..phir chilla kar bolte the-thik hai abhi dhire -2 antenna ko ghumate hai ..jaha pic thik aa jayega ..vaha bata dena !!
Dusre ne kaha “bhai is se bhi to majedaar mera tv tha .black in white tha .pic kabhi kabhi left se right khisak jata tha to kabhi right se left !!”
Itne mein ek dost bol pada “kaahe be !! tera tv ‘left’ walo ne ghus mein tere papa ko diya tha kya jo kabhi gov mein baithne ke liye ‘right’ ho jata hai to kabhi ‘left’ !!” hasi ka phir se ek thahaka utha ..phir dusre ne kaha “nahi yaar !! thekedaar ne ghus diye honge usi paise se papa tv laaye honge ..ab tv ki bhi baat sun le.jab kabhi yeh prob aati to hum dekhte the ki pic kidhar move hua hau ? agar left ki taraf move hua to tv ke right side par hath marte the aur right ke taraf move hue to left ki taraf !! phir pictue sahi aata tha !!ek mitr bol pade jo baat ki khaal nikalne ke liye mashoor aadmi hai.
“acha yeh bata ..jab pic beech mein aa jata tha to kya karte the”
“simple yaar !! tv ke dono taraf marta tha!!”
“acha !!” kutil muskaan ke sath marketing wale dost bole tv ki taraf ishara karte hue .tv par ab fashion tv aa raha tha.phir saare has pade paglo ki tarah ..2 dost shadi-shuda the , samjh gaye ki yeh ab baat ko kaha le jayenge !! sare samjh rahe the ki aage kya hone wala hai ..
un mein se ek bole “beta !! chinta na karo.thode din mein sab kuch samjh mein aa jayega”
mejbaan dost bhi shadi-shuda aadmi hai par yaha bachelors ki tarah akele rah rahe hai is intezaar mein ki jab managerial post mil jayega tab biwi-baccho ko layenge .usne kaha “in logo ko abhi samjh mein nahi aa raha hai bhai ?? jab biwi belan-chuka-chholni se maregi tab pata chal jayega”
“aap in mein se kis se maar khaaye hai” ek dost jor se haste hue pucha.
Phir sare has pade .
“bhai maar khane ki jaroorat kya hai?? Bus jab wife ko tension dena ho to aur maar khana ho to cable hatwa do” shadi-shuda number 1 wale dost bole.
“aap kitni baar cable hatwaye hai” maine puch dala
phir taali pe taali aur jor ki hasi

“abe nahi yaar humari biwi to doordarshan ki tarah hai ..kuch bhi kar lo ..cable walo ki nakhre nahi dikhati !!” jhep gaye the voh jawab dete-2. “aur beta tera hi number agla hai.dekh liyo tu khud hi”.
“hum to tv hi nahi rakhenge bhai ji” main bola
“beta !! sab rakhoge” yeh dusre shadi-shuda mitr bole.
“saas-bahu band gaya yaar .ab tv kya rakhna” yeh humari mitr mandli ke hi ek dost bole jo tv par saas-bahu ke bahut bade fan the ..kya hua hai ab saas-bahu aur kya hoga yeh bhi bata dete the .aisa lagta tha jaise ekta kapoor ke voh hi writer ho.
“lo beta isi ghum mein aur jayda udhel lo .waise bbhi tumhara peg khali ho gaya hai” saki bane hue ek dost ne uski glass mein adha se jayda udhel diya .
“abe saale !! kya kar rahe ho?? Abhi puri raat baki hai peene ke liye” saas-bahu wale dost bole.

Tab tak party sabke sar par chadd chuki thi ..tv ki taraf koi ab dhayaan bhi nahi de raha tha .achanak ek mitr bole “yaar koi music-wusic laga kar chhod do ..tab sare logo ka dhyaan tv par gaya .har koi apni –apni farmaaish karne lag gaya.
“abe mtv laga do”…..yeh main tha !!
“are nahi yaar ..saale jab dekho to mtv .are zee par dekh le .waha thik hai”..dusre mitr bole.
“are nahi nahi !! sab tv par movie aa raha hai” ek aur bole
“jab movie hi dekhna hai to sony par abhi acha movie aa raha hoga” teesre bole
“kya yaar !! rah gaye tum ek dum vohi .saale kitne baar kahe ki hindi ‘filmiwa’ ek dumein ‘faltuwa’ movie hota hai.aisa karo hbo laga do” yeh dusre number wale bole jo shadi-shuda aashram ke sadasya the.
“ hatao yaar !! ab main chala .biwi ka ph aa gaya ki kaha hu main ?” yeh pahle number wale bole jo shadi-shuda aashram ke sadasya the.
“haan-haan.ab aap nikal jaiye” mere mejbaan dost bole .
tabhi phir se tv par fashion tv aa agaya ( laga diya gaya)..shadi-shuda wale dost ja rahe the ..ruk gaye dekhne ke liye ftv !!
phir sare jor se paglo ki tarah has pade .
shadi-shuda dost jinki biwi ka ph aaya tha ..voh bole “sala is se acha doordarshan hi tha ” !!!!!!!

kyon bhula nahi paya

kyon bhula nahi paya
kya sawal puchu
kya jawab mangu
sukhte hai jab aasoon
gherte hai yadon ke saaye
chhalke jab akhon se lahu
duwayen to nahi labo pe
baddua bhi to nahi
rokta hu jab aasoon
jo bah chale meri akhon se
na ban jaaye voh baddua tere liye ....

kuch der

kuch der thehro
palko par ruke hai sapne
akhon mein tasveer sari
hotho ko mil ke labo se
kuch der thehro....
sinduri rang bikhre
bindiya bhi kahti kahani
tuti jo chudiyan teri
kahti hai voh bhi
kuch der thehro
saans jo ghul gayi hai
kahte hai kuch der thehro.....

roti,kapda aur makaan..ke uper

kisi bhi insaan ki sabse aham zaroorat roti,kapda aur makaan ki hoti hai ..par in sabse uper jo aata hai voh hai samman ...aatmasamman ...jo insaan ko samaj mein ek haisiyat aur apne aap mein ek mahatavapurna hone ka ehsaas dilati hai .
isi ko prapt karne ke liye bihari chhatra naukri-pani ki talash mein apna ghar-dwar se door sab kuch chhod kar apne parijano se hazaro kilometer chale jate hai ....is ummid mein ki jo unhe apne pradesh mein nahi mila ...voh shayad kahi aur mil jaaye .aur unki mehnat aur kabiliyat ke bal par voh sab kuch unhe mil bhi jata hai ..jiski talash aaj ka har yuva karta hai .
par isko paane aur na paane ke pahle jo unhe sahna padta hai ...voh hai bihari hone ka dansh ...bihari hone ki saja ..aur bihari hone ka apmaan ..jo har jagah unka picha karti hai ..kabhi to unke hi muh par ...kabhi unke peeth ke piche aur kabhi kabhi to bihari hone ki saja itni jor se milti hai ki dukh-apmaan se pidit hone ke baad dimag sochne par majboor ho jata hai ki kya "bihari hona hi apne aap mein itni badi saja hai ki koi unhe dekhna nahi chahta ...??"
kal tak jo hindutatva ka jhanda lekar ..ek khas sampradaay ko nishana banaya karte the ..vohi aaj marathi manus ka naam lekar bihariyo par apne julm ki nayi daastaan likh rahe hai ...4 bihari ladko ko itni buri tarah peeta gaya ki un charo ne dum tod diya ...kya jo bihari ladke mare gaye ..unki aakehon mein kuch kar gujarne ke sapne nahi the ...kya unke budhe hote hue ma-baap ki aakhon mein unke ache bhavishya ki kaamna nahi thi ...kya jin logo ke kaaran unki jaan chali gayi ...voh hindustani ka naam lekar unke ma-baap ke aasoon pochne jayenge kabhi ......nahi ..kabhi nahi kyon ki unhe yeh matlab nahi hai ki kaun mara aur kiske asoon tham nahi rahe hai ..
jinko lagta hai ki bihari unka hak maar rahe hai to unko yeh kyon nahi lagta hai ki jab unke bachhe disco mein ja rahe hote hai tab us samay kahi bihari ladka apne aap ki bhi parvaah kiye be-gair din-raat mehnat kar raha hota hai ..sirf ek behtar bhavishya ke liye ..jo voh sirf apne mehnat par paate hai ..unke ma-baap jo ek roti kam kha lete hai par apne bachho ko padhne ke liye 2 paise jayda dete hai taki unka bachha/bachhi padh likh jaaye aur apne pairo par khada ho jaaye ..
aur akhir is gundai ki raajneeti par kab tak voh bihariyo ko unka hak dene se rok sakte hai ....is desh ki neeti-neerdharan karne walo mein ek acha khasa hissa un bihariyo ka bhi hota hai jo UPSC jaise mushkil xam ko paar kar ke jate hai ..
sabse jayda aascharya ko is baat par hai ki ...yeh sab pichle kai saalon se hota aa raha tha ..aur pichle 2 saal mein mumbai mein yeh ek bhayankar samasya ban gayi hai ..phir bhi desh ke sabse bade-bade neta is baat chup baithe the aur unki chuppi ki wajah yehi hai kyon ki unhe is baat se koi matlab nahi hai ki ek bihari naukri ki talash mein jata hai aur kuch log ki hinsa (aur apmaan bhi) ki wajah se dum tod deta hai ...kyon ki unhe bihari se koi matlab hi nahi ...voh sirf ek vote bank hai ...voh mare ya jiye unki bala se !!
aur iski pratikriya jo bihari chhatro ne bihaar mein dikhayi hai ..voh bus unke aakrosh ka ek hissa bhar hi hai ...
sarkar chahe voh maharashtra ki ho ya phir delhi ki kendra sarkaar ya phir bihar ki rajya sarkaar ....agar samay rahte voh nahi chete aur isko rokne ke upaaye nahi kiye gaye ..to aane wale samay mein voh is nafrat ko badhne ke liye saman roop se doshi honge aur apradhi bhi ....aur iska dansh bihariyo ke sath -2 sabko jhelna pad sakta hai

khushi

aaj main do blog likh raha hu ...title dono ke veepreet hai..dard aur khushi ...hazaro khwahise aisi ki har khawahish par dum nikle ....bahut nikle mere armaan lekin phir bhi kam nikle ...nikalna khud se adam sunte aaye hai lekin ..bahut be-aabru ho kar tere kuche se hum nikle ....aaj south x mein ghumte mein jo maine dekha voh is ghalib ke sher ko bayan kar jata hai.AIIMS se ek aadmi nikla tha ..apne bachhe ko lekar ghumane ke liye .aarthik roop se voh kisi bmw car mein ghumne wala baap nahi tha .main vohi khada ho kar chai pi raha tha aur barish ke chhut jane ka intezaar kar raha tha .voh bhi vohi aaya ...bagal ki dukaan par std laga kar apne wife ki beemari ki haal bata raha tha .baat cheet se laga ..yaha uske kafi paise kharche ho gaye hai aur jise voh baat kar raha tha ..voh paise lekar delhi aane wala tha.ph jab kar chuka tab voh bhi chai ki dukaan par aaya aur 2 chai aur kuch namkin ka order diya .phir apne bachhe se bola "abhi namkin aur chai le lo..phir tumko ghuma dete hai.."
ladka bola"nahi papa....chai nahi peena"
"phir kya loge" pita ne pucha..
"pepsi" ladka bola..
tabhi us aadmi ne pepsi ka bottle manga ..dukaan daar bola "yaha pepsi ka bottle nahi milega...bada 2 litre ka hai de du ??"
tab uske pita ke chehre aur mathe par maine bal padte dekha ...phir usne dhire se apne pocket mein hath dala..paise nikaal kar gina..
phir apne ladke ki taraf dekh kar bola"chalo hospital mein kharid denge"
chhota bachha ....kya jane ?? voh bol pada ..."nahi papa ...waha nahi milta.yehi se le lo na ..mummy aur shalu ko de denge "
pita dhire se muskuraya ...aur phir dukaandaar ki taraf dekh kar bola"thik hai ..bachhe ko de do ..jo bhi mang raha hai"
bottle hath mein aate hi ..ladke ke chehre par muskaan aa gayi aur bahut khushi bhari nigaah se kabhi bottle ko dekhta to kabhi apne papa ko....

dard

stri ..janani..mahila..aurat..ladki..naam alag alag ho sakte hai par yeh sab ek hi varg ko sambodhit karte hai ..jiska naam hum sabhi janam se hi jante hai.
stri ka janam....jo dard se shuru hota hai aur uski mritiyu (dead) par ja kar kahatm hota hai...aaj is adhunik samaj mein jab hum stri ki azadi ki baat sochte hai aur us par vichar karte hai to pate hai ki log isko ek aandolan ka roop dene ki baat kahte hai ...par kya kabhi voh is baare mein bhi sochte hai ki akhir unhe kis ki aazadi chahiye ?? us stri ki ..jo aadhunik parivaar mein bhi rah kar aaj bhi azadi se ghum nahi sakti ..kyon ki uske aane jaane par parivaar(ya phir uske bhai,pati) ki nazar rahti hai. YA phir unhe apne hi vicharo ki azadi chahiye ..jo mahila aandolan mein to stri ka samarthak hota hai aur parde ke piche uska shoshak !!
agar mere hisaab se dekha jaaye to ghar se shoshan shuru hota hai ..."voh ladka hai ..apni man marzi kar sakta hai" , "nahiiiii...college se sidha ghar aao aur kahi jana ho to ghar par ph karo"..aur kuch nahi to main agar kahu to rasoi(kitchen) bhi ek jariya hai ...jaha yeh janani apna mahatv khud gira leti hai ....sabko ache ache thali mein khana de kar phir khud hi kisi bhi thali YA katore mein khud lena !! kyon ??
ladki hai ....padha likha diya ....career banaana chahti hai to chalo usko apna career bhi banane do par jab shadi ki baat aaye !!!! nahi .....hum tumhare parents hai ....hum tumahri shadi ke liye ladka dekhenge aur ladki kahi kisi ke sath judi hui hai to anjaam yeh hoga ki ya to voh us se alag ho jaye nahi to parivaar se virodh kare !! agar ladke se alag hui to aaj ke samay mein kya ho sakta hai ..kehna nahi hoga .MMS ....jo jaydatar aise hi cases ke hote hai.aur apne parivar se virodh kare to ladki par ilzaam laga diya jata hai.
garib tabke ki baat kare to kahani aur bhi bad se badtar hai .nahi ....sirf baaton se kuch baat nahi banti ...kuch karne ke liye kadam uthana zaroori hai ...mardo( aur is mard ki paribhasha mein sare ladke,bhai,purush,pati aate hai) ko apni soch badalni hogi ....jisne janam diya hai usko uske adhikaar bhi do ....jine ka ...apni soch ko aage rakhne ka .....aur sabse pahle uske liye ek achi sikhsha (education) ..jo usko kabil insaan banayegi..

are ruk ja....

“are ruk ja …
are dham ja …
areee ruk ja re bande …
areeee dham ja re bande
ke kudrat has padegi hoooo…..”


Indian ocean ka gaayaa hua “black Friday” ke liye yeh gana sidhe saade shabdo mein sab kuch keh jata hai jo aligarh mein ho raha hai ..par jinko rukna hai …voh kab rukenge ….pata nahi ??
Film aur sahitya ( literature) kisi bhi samaj ya desh ka aaina hote hai . “black Friday” , “Bombay” ,Bhishm sahni ka “tamas” , khushwant singh ka “train to Pakistan” ek aise such se ru-b-ru karata hai jiske bare mein sabne ne padha aur kabhi kabhi tv aur film mein dekha hai par jin logo ne is tamas ko mehsoos kiya hai aur is dukh dard ko saha hai ..voh hi jante hai akhir yeh kya bala hai jiska naam DANGA hai .
Har kahani ka ek madhayantar aur ek ant hota hai ..jo pichle dino aligarh mein hua voh to bus ek madhyantar hai …is dange ki kahani ka koi ant nazar nahi aata ..
Kitne dukh ki baat hai …jiska aasraa sabhi lete hai ..usi ka naam lekar ek aadmi insaan se haivaan ban jata hai aur khun ki nadiya aise bahata hai jaise voh khun na ho kar pani ho ..jiski keemat ka andaja pata tab chalta hai jab voh phir se insaan ban kar kuch sochne par majboor hota hai .
Karl Marx ne sahi kaha tha “ dharm ( religion) aam janta ke liye afim ( opium) hai” aur isi afim ke nashe mein voh haivaan banta hai varna ek mandir aur ek masjid se kisi ka bhala hota to aaj sari dunia ke sadko , muhallo mein mandir , masjid aur dusre dharmik bhavan har dusri gali mein nazar aate !
Ek baar bhagwan budha ja rahe the tabhi daku angulimaal ne unhe marne ke liye roka . bhagwan budha ne kaha “main to ruk gaya ..TU KAB RUKEGA ??”
Hinsa ka jawab pratihinsa nahi hai .hinsa aur pratihinsa dange ka rup leti hai aur badle ki aag ko janam deti hai . badle ki aag manushya ko us chita ki agni se bhi jayda tez jalati hai jis chita par ek murda insaan pada hua hota hai ….fark sirf itna hai ki murde ko us agni ki dahak ka pata nahi chal pata hai aur jinda manushya pal pal us agni ko apne dil ,dimag aur sharir mein mehsus karta hai aur samanta sirf itni hai ki voh aag khatam hone par dono hi raakh mein badal jate hai .ek panch tatva mein vileen ho jata hai aur kahi bhi vileen nahi hota .

Main aaj ke angulimaal daku se puchta hu jo aaj har dharm mein ghus gaye hai ….TU KAB RUKEGA !!

kahani ka plot kya ho????

Kahani ka plot kya ho, is baat par kahanikaar ki vyatha badhti hi ja rahi thi .voh bechara is dukh ko kinare rakh kar kahani ke plot par 2 din se apna sar khapaye ja raha tha . to chaliye is kahani ke kirdaar, jo ek kahanikaar hai, ka naam bhondu rakh dete hai kyon ki bina naam ka kahanikaar ki koi pehchaan nahi hoti hai , akhir har kahanikaar ka koi ek naam hota hai .
Hua yun ki pichle kai dino se bhondu ka haajma acha nahi chal raha tha .rah rah kar uske pet mein dard hota tha . doctor ke paas gaya kyon ki usne dadi ma ke sare nuskhe aajma kar dekh liye the phir bhi uska haajma aur pet ka dard acha nahi hua .ab akhir mein doctor hi ek sahara bachte hai kisi bhi eelaaj ke liye .
Doctor sahib ne uska ache se checkup kiya par bimari ka kya kaaran hai yeh unhe samjh nahi aaya . tab unhone use pneumonia se lekar HIV aur ECG tak ke test karwa daalne ko bola . jab sare report doctor sahib ke paas aaya to doctor sahib haairaan – pareshan !! sare report positive aaye the aur bhondu ka HIV test bhi negative aaya . ECG test bhi sahi aaya . tab doctor sahib ne socha ki ho sakta hai ki bhondu ko manovaigyanik samasya ( psychological problem) ho kyon ki kabhi kabhi manovaigyanik samasya ke kaaran bhi rog paida hote hai . unhone use psycho test karwane ko bhi bola . jab iske bhi result saamne aaye to doctor sahib aur bhi jayda hairaan – pareshan kyon ki bhondu ka IQ , EQ bhi sahi aaya tha . doctor ko laga ki kahi unki MBBS degree to kahi fail to nahi kar jayegi aur phir unhe apna jama jamaya clinic band na karna pade aur MBBS ( miya , biwi, bachha sath) ho kar ghar par baithna pade . akhir market mein bhi unki achi khasi reputation thi aur itne saalo se practice kar rahe the par aisa complicated case nahi aaya tha .
Unhe pasine aane lage , unhone ghanti dabaai . bahar baithi nurse daudi aayi .nurse ko laga ki bhondu kal raat ko pani pilane ko bol raha tha aur voh cable tv par film dekhne mein busy thi , kahi usi ne to kahi shikaayat nahi kar di hai . par uska andaaja galat tha .
“fan chala do” doctor sahib ne hukum diya .
nurse ne unhe ghurte hue dekha kyon ki room mein ac chal raha tha .
“sir……..” nurse ac ke bare mein bolna chah rahi thi ki tabhi doctor sahib se use daat pila di .
“kaha na , fan chalao”
nurse asmanjas ki sthithi mein fan chala kar fan ki hi tarah matakte hue room se bahar chali gayi .
doctor sahib ne preshani ko kam karne ke liye ek cigarette jalaya . bhondu ne apne baaye taraf ki diwal par ek poster dekha “no smoking” ka . par use laga yeh shayad marijo ke liye doctor sahib ne lagaya hai kyon ki ho sakta hai ki unhe apne saamne kisi marij ka cigarette pina acha nahi lagta ho . ek to marij aur ek marij ho kar cigarette pina to aur bhi buri baat hai . isi baat ko dhayan mein rakh kar doctor sahib khud cigarette pi rahe hai , yehi soch kar bhondu ne apne dil ko tassalli di . par bhondu ko kya pata ki uske case ne doctor sahib ko tension de diya aur voh dhunve mein apne tension ko door kar rahe hai .
Idhar doctor sahib soch rahe the ki akhir baat kya hai ? sare test bhi thik hai par phir yeh marij bol raha hai ki uske pet mein dard hota rahta hai aur haajma sahi nahi chal raha hai .tab unhe laga ki ho na ho psycho test mein isne kuch chhipa liya ho kyon ki aksar psycho test mein marij kuch na kuch chhipa leta hai jiske kaaran test mein gadbadi aa jati hai . tab doctor sahib ne uska psycho analysis karna shuru kar diya aur lage psycho interview lene .
Sawal puchte gaye aur bhondu sawal ke jawab deta gaya . isi sawal – jawab mein unhone puchha .
“kya karte ho??”
“kuch nahi” bhondu ne shant sawar mein kaha .
“kuch nahi !!!” doctor sahib ko jhakta laga .
“haan” bhondu ne phir vohi kaha .
“phir bhi kuch na kuch to karte hi hoge” doctor sahib ne use aur kureda.
“kuch karta nahi ..bus kabhi kabhi kuch article , ya phir kahani likha karta hu” bhondu ne kaha.
Doctor sahib ke chehre par 1000 watt ki muskurahat aa gayi .unhe unke marij ki samasya ka hal mil gaya tha . tab tak unki dusri cigarette bhi khatam ho chali thi . unhone vohi par bhondu ka psycho test rok diya . ab doctor sahib ko pakka yekin ho gaya tha ki saamne baitha yeh bhondu jaisa dikhne wala marij bhondu ke pet mein writer banne ka kida paida ho gaya hai aur rah rah kar yehi kida uske pet mein dard paida karta hai aur yehi wajah hai ki iska haajma acha nahi rahta hai .
“tumne bahut dino se kuch likha nahi hai” doctor ne 100+1 percent ke confidence ke sath kaha .
ab jhakta lagne ki bari bhondu ki thi . voh chauk ke bola ,
“haan!! Aapko kaise pata chala??”
ab doctor sahib puri tarah se aaraam ki mudra mein aa gaye .apne jeb se ek gutkha ka packet nikala aur faad kar kha gaye .bhondu ne phir diawal ki taraf dekha .uske dahine taraf ki diwal par likha tha “jindgi chuno …tambaku nahi” , phir bhondu ko laga yeh marijo ke liye hi likha gaya hai .
“aisa karo , ghar jaao . kuch likho ,kuch nahi likhne ke kaaran hi tumhare pet mein dard ho raha hai” doctor sahib gutkhe ke ras ko muh mein ghumate hue bole .
doctor sahib ne chain ki saans li kyonki bhondu ke piche unhone apna pura sar khapa diya tha . voh to shukra hai ki medical ki padhai ke dauraan university walo ne mbbs mein ek paper general psychiatry ka bhi rakha tha varna yeh bhondu to aaj puri medical thesis ki vaat laga deta . ab voh ghar jakar whiskey ke 2 peg laga kar aaraam se tv dekhne ke bare mein sochne lage .
bhondu ko bhi yekin ho gaya kyon ki doctor sahib ne pakad liya tha ki usne bahut dino se kuch bhi nahi likha tha .voh ghar aakar khana pina kha kar likhane ko baitha . socha pen se paper par likhu ya phir computer par hi type karu ?? phir usne socha ki ache ache writer ab paper par nahi likhte , voh ab computer par likhte hai . par samsya yeh thi ki bhondu to hindi mein likhta hai .aur computer mein to sirf English mein hi type ho sakta hai . par bhondu ji apne dil ko yeh kahte hue tassalli di “kya hua agar main computer par hindi bhi English mein type karu!! . akhir hindi filmo ke naam bhi to English mein likhe jate hai aur aaj kal to hindi film USA aur UK mein bhi hindi mein hi hote hai par phir bhi voh hit hote hai” .
bus isi baat ko dhayan mein rakh kar bhondu ji likhne baithe . par yeh kya ???? ab dusri samsya khadi ho gayi . bhondu sochne laga ki akhir likhu kya ?? kahani likhu , novel likhu ya phir koi article likhu .kahani ya novel likhunga to bahut sare kirdaar (character ) banane padenge phir har character ke samvaad(dialogue) likhne padenge phir har kirdaar ke liye mahaul(situation) bhi banana padega . is se acha hai ki koi article hi likh liya jaye .par article bhi likhe to kis par ?? iran , iraq , usa par bahut kuch paper mein likha aa raha hai , tv par aa raha hai .is par likhna kuch baaton ko duhrana hoga aur kuch baaton ka virodh karna , kul milakar article ki kahani bhi bhayanak ( horrible) ho jayegi ,jismein kuch log khush honge to kuch naraj . aur bhondu kisi ko naraj nahi karna chahta .
phir bhondu ne socha kyon na kisi celebrity par kuch likha jaaye .celebrity ka sochte sochte uske dimag mein bahut se log aane lag gaye . film star , politician , samaaj sudharak ,kahanikaar , kavita likhne wale kavitakaar aur shayar , pop singer . ab yaha bhi bhondu ki samsya ( jo ab unki vayatha mein badalti ja rahi thi ) khatam nahi hui . akhir celebrity par likhna hai to kis celebrity par likha jaye ?? agar film star par kuch likhte hai to film wale magazine ka kya hoga ? politician par kuch likhte hai to paper aur tv walo ko kya hoga ?? aur kahi kuch ulta sidha likh diya aur voh kisi politician ne padh liya to bhondu ke ghar par income tax walo ,police walo ka aana jaana shuru ho jayega .aur agar kisi rachnakaar chahe voh writer ho , shayar ho ya phir kavitakaar ke bare mein likhta hu to log kahenge ki dekho apne aap ko unse bhi bada samjhta hai ..kuch to aata jaata hai nahi aur unke bare mein chale hai likhne !! aur kisi samaj sudharak ke bare mein likhta hu to log kahenge ki pahle khud ko sudhar lo phir kisi samaj sudharak ke bare mein likhna .ab bache pop singer ..to unke bare mein tv aur paper mein aata hi rahta hai .
ooh !! bahut badi samsya hai aapki bhondu ji !! logo ke bare mein kitna sochte hai aap !! log yeh kahenge ..log voh kahenge aur yehi samsya ab bhondu ki vayatha banti ja rahi thi .tab bhondu ne socha kyon na apne bare mein hi kuch likha jaaye par yeh kya !! bhondu ki dimag ki batti gul !!!! akhir hua hi kya tha uske sath jo hindi sahitya aur English sahitya ke bade bade lekhako ke sath hua aur sahitya ke dunia ke alawa jin jin logo ke sath kuch na kuch hua aur unke bare mein likha gaya ..unhone kuch aisa kiya hai jiska prabhaav samaj aur desh – dunia par pada . par bhondu ke sath yeh bhi baat nahi thi .
ab bhondu ne dimaag ke ghode daudaana shuru kar diye . akhir likha jaye to kis par …?? Idhar pet mein bhi dard ho raha tha . bahut der sochne par achanak unke dimag ki batti jal uthi .
kisi bhi article ,kahani ya novel ka kuch aadhaar( plot )hota hai .pahle ek plot ke bare mein socha jaye ..phir kahani ya article to khud-ba-khud likh denge .
ab bhondu kisi plot ke bare mein ache se sochne laga. Par pet mein to dard abhi bhi ho raha tha .is dard ko mitane ke liye kuch na kuch to likhna hi padega . bahut soch samjh kar bhondu ne kahani (?)( ya phir article …mujhe pata nahi kyon ki bhondu ne abhi tak nishchaye(decide) nahi kiya tha ki voh kahani likhne ja raha hai ya phir koi article) ka shirshak (title ) ..“kahani ka plot” apne computer par type kiya .
areeeee yeh kya !! bhondu ka pet ka dard bilkul thik ho gaya .chamatkaar !! chamatkaar!! Aaj ke yug mein bhi chamatkaar!! Ek writer ka pet sirf shirshak likhne se thik ho gaya. Bhondu ki kushi ka thikana nahi raha .akhir bahut dino ke baad voh kuch likhne ja raha tha . dard to thik ho gaya par vayatha to abhi bhi hai …akhir likha kya jaaye ????
bhondu abhi soch raha hai ..aur main bhi soch raha hu ki akhir yeh bhondu ki kahani ka plot kab samapt (end) hoti hai .

Story of a Man

A Man once approached a Sadhu for initiation. The Sadhu said: “I will initiate you when I meet you next time.” The Man pressed the Sadhu again and again on several days for quick initiation. The Sadhu totally declined. He returned to the Man after a couple of years. He placed in his Bhiksha-bowl some mud, hair, urine and excreta and approached the Man for alms. The Man brought nice sweet-meats, Kheer, Halwa, etc., for the Sadhu. He prepared nice dishes as he thought he would be initiated this time by the Sadhu. The Sadhu said to the Man: “Put everything in my bowl.”

The Man said: “How can I place them, Swamiji, in this dirty bowl. Kindly clean the bowl and bring it to me. I will place all the preparations in it.”

The Sadhu replied: “When such is the case with this bowl how can I place the pure Lord in your heart which is filled with various impurities like lust, anger, pride, greed, etc. How can I initiate you now, when your mind is very dirty like this bowl?”

The Man got vexed and went away in shame. He purified himself through charity and selfless service and got himself initiated by the same Sadhu after some time. The ground (mind) must be prepared first. Why do you bother much about Upadesha? Purify yourself. The initiation will come by itself.